అలరించిన తాళం భజన స్థానిక బృందావన్ గార్డెన్స్ శ్రీ వేంకటేశ్వరస్వామి దేవాలయ ప్రాంగణం అన్నమయ్య కళావేదికపై శనివారం శ్రీ సాయిమారుతి భజన మండలి, గుంటూరు వారిచే తాళంభజన కార్యక్రమం ప్రేక్షకులను అలరించింది. తొలుత ఆలయ కమిటి అధ్యక్షులు సీహెచ్. మస్తానయ్య, ఉపాధ్యక్షులు లంకా విజయబాబు, విద్యావేత్త నూతలపాటి తిరుపతయ్య జ్యోతిప్రజ్వలన చేసి కార్యక్రమాన్ని ప్రారంభించారు. వి. మల్లేశ్వరరావు బృందం తమ గాత్ర ధారణలో ఓ గణనాథ, జయ గణనాధ, విఠల విఠల పాహిమాం, హరహర మహాదేవ, ఓం సాయి శ్రీసాయి అంటూ పలు భక్తి గీతాలను తాళంభజన రూపంలో చక్కగా ఆలపించి ఆహుతులను ఆకట్టుకున్నారు. తబలపై రమణ, కీబోర్డుపై సాయి వాయిద్యసహకారం అందించారు.
శ్రీ గణేశ భుజంగ ప్రయాత స్తోత్రమ్ పై ప్రవచనం
స్థానిక బృందావన్ గార్డెన్స్ శ్రీ వేంకటేశ్వరస్వామి వారి దేవాలయం అన్నమయ్య కళావేదికపై బుధవారం శ్రీ గణేశ భుజంగ ప్రయాత స్తోత్రమ్ పై ఆధ్యాత్మిక ప్రవచనం జరిగింది. తొలుత ఆలయకమిటి అధ్యక్షులు సీహెచ్. మస్తానయ్య, ఉపాధ్యక్షులు లంకా విజయబాబు, సహాయ కార్యదర్శి ఊటుకూరి నాగేశ్వరరావు, సత్సంగ్ సభ్యులు జ్యోతిప్రజ్వలన చేసి కార్యక్రమాన్ని ప్రారంభించారు. సుందర సత్సంగ్ సభ్యులు కె.వి. కోటేశ్వరరావు ప్రవచిస్తూ శ్రీ గణేశ భుజంగ ప్రయాత స్తోత్రమ్‌లో స్వామి పరబ్రహ్మ తత్త్వాన్ని, శరణాగతిని స్తోత్ర పఠన ఫలితాన్ని వర్ణిస్తాయన్నారు. గణనాథుడు నిర్వికల్పుడు, త్రిగుణాలకు అతీతుడు, సచ్చిదానంద స్వరూపుడు, సమస్త విశ్వానికి సృష్టి, స్థితి, లయకారకుడైన పరబ్రహ్మ అని వివరిస్తూ భక్తుడు ఆ స్వామి పాదపద్మాలకు నమస్కరించి అనుగ్రహాన్ని కోరడం ఇందులో కనిపిస్తుందన్నారు. ప్రాతఃకాలంలో భక్తిశ్రద్ధలతో ఈ స్తోత్రాన్ని పఠించే వారికి గణపతి ప్రసన్నుడై సర్వ కామ్యాలను నెరవేరుస్తాడన్నారు. వాక్శుద్ధిని, విఘ్న రహితమైన విద్య, సకల ఐశ్వర్యాలను ప్రసాదిస్తాడని ఫలశ్రుతి ద్వారా వివరించబడిందని రెండురోజుల ప్రవచన కార్యక్రమం భగవత్ భక్తులకు సవివరంగా వివరించారు.
కామెంట్‌లు
కామెంట్‌ను పోస్ట్ చేయండి