అలరించిన తాళం భజన స్థానిక బృందావన్ గార్డెన్స్ శ్రీ వేంకటేశ్వరస్వామి దేవాలయ ప్రాంగణం అన్నమయ్య కళావేదికపై శనివారం శ్రీ సాయిమారుతి భజన మండలి, గుంటూరు వారిచే తాళంభజన కార్యక్రమం ప్రేక్షకులను అలరించింది. తొలుత ఆలయ కమిటి అధ్యక్షులు సీహెచ్. మస్తానయ్య, ఉపాధ్యక్షులు లంకా విజయబాబు, విద్యావేత్త నూతలపాటి తిరుపతయ్య జ్యోతిప్రజ్వలన చేసి కార్యక్రమాన్ని ప్రారంభించారు. వి. మల్లేశ్వరరావు బృందం తమ గాత్ర ధారణలో ఓ గణనాథ, జయ గణనాధ, విఠల విఠల పాహిమాం, హరహర మహాదేవ, ఓం సాయి శ్రీసాయి అంటూ పలు భక్తి గీతాలను తాళంభజన రూపంలో చక్కగా ఆలపించి ఆహుతులను ఆకట్టుకున్నారు. తబలపై రమణ, కీబోర్డుపై సాయి వాయిద్యసహకారం అందించారు.
సేవాకార్యక్రమాలకు స్పందించిన దాతలు
గుంటూరు బృందావన్ గార్డెన్స్ నందు వేంచేసియున్న శ్రీ వేంకటేశ్వరస్వామివారి దేవాలయ అనుబంధ సంస్థ, అనేక మానవతా కార్యక్రమములు నిర్వహిస్తున్న శ్రీ అన్నమయ్య సేవాసమితి చేపట్టిన నార్ల వెంకటేశ్వరరావు ఆడిటోరియం పూర్తి చేయుట మరియు అవసాన దశలో ఉన్నవారిని ఆదరించే అంతర్యామి నిర్మాణాలకు దాతలు విశేషంగా స్పందించారు. కమిటి సభ్యులు, అన్నమయ్య ఆధ్యాత్మిక గ్రంథాలయ వ్యవస్థాపకులు, గ్రంథాళ్వార్ లంకా సూర్యనారాయణ గారి కుటుంబసభ్యులు 50 లక్షల భూరి విరాళం సమర్పించారు. ప్రముఖ వైద్యులు, అనేక విద్యాసంస్థల నిర్వహణలో భాగస్వామి డాక్టర్ కొండబోలు బసవపున్నయ్య గారు 10 లక్షలు విరాళంగా అందించినట్లు దేవాలయ పాలకమండలి అధ్యక్షులు సీహెచ్. మస్తానయ్య తెలిపారు.
కామెంట్‌లు
కామెంట్‌ను పోస్ట్ చేయండి