అలరించిన తాళం భజన స్థానిక బృందావన్ గార్డెన్స్ శ్రీ వేంకటేశ్వరస్వామి దేవాలయ ప్రాంగణం అన్నమయ్య కళావేదికపై శనివారం శ్రీ సాయిమారుతి భజన మండలి, గుంటూరు వారిచే తాళంభజన కార్యక్రమం ప్రేక్షకులను అలరించింది. తొలుత ఆలయ కమిటి అధ్యక్షులు సీహెచ్. మస్తానయ్య, ఉపాధ్యక్షులు లంకా విజయబాబు, విద్యావేత్త నూతలపాటి తిరుపతయ్య జ్యోతిప్రజ్వలన చేసి కార్యక్రమాన్ని ప్రారంభించారు. వి. మల్లేశ్వరరావు బృందం తమ గాత్ర ధారణలో ఓ గణనాథ, జయ గణనాధ, విఠల విఠల పాహిమాం, హరహర మహాదేవ, ఓం సాయి శ్రీసాయి అంటూ పలు భక్తి గీతాలను తాళంభజన రూపంలో చక్కగా ఆలపించి ఆహుతులను ఆకట్టుకున్నారు. తబలపై రమణ, కీబోర్డుపై సాయి వాయిద్యసహకారం అందించారు.
విరాటపర్వంపై ప్రవచనం
స్థానిక బృందావన్ గార్డెన్స్ శ్రీవేంకటేశ్వరస్వామి ఆలయ ప్రాంగణం అన్నమయ్య కళావేదికపై మంగళవారం మహాభారతం విరాటపర్వంపై ఆధ్యాత్మిక ప్రవచనం జరిగింది. తొలుత ఆలయకమిటి సభ్యులు జ్యోతిప్రజ్వలన చేసి కార్యక్రమం ప్రారంభించారు. ఆధ్యాత్మికవేత్త గుదిమెళ్ళ శ్రీకూర్మనాథస్వామి ప్రవచిస్తూ మహాభారతంలోని విరాటపర్వం పాండవుల పదమూడో ఏట సాగిన అజ్ఞాతవాస వృత్తాంతాన్ని తెలియజేస్తుందన్నారు. పన్నెండేళ్ల అరణ్యవాసం ముగిసిన తర్వాత, పాండవులు ద్రౌపదితో కలిసి తమ గుర్తింపును దాచుకుని మారుపేర్లతో విరాటరాజు కొలువులో చేరతారన్నారు. ధర్మరాజు కంకుభట్టుగా, భీముడు వల్లభుడుగా, అర్జునుడు బృహన్నలగా, నకుల సహదేవులు అశ్వ-గోసంరక్షకులుగా, ద్రౌపది సైరంధ్రిగా స్థిరపడతారన్నారు.
కామెంట్‌లు
కామెంట్‌ను పోస్ట్ చేయండి