కృష్ణలీలా వైభవ వర్ణణ నిధి గోవిందాష్టకం స్థానిక బృందావన్ గార్డెన్స్ శ్రీ వేంకటేశ్వరస్వామి వారి దేవాలయం అన్నమయ్య కళావేదికపై బుధవారం శ్రీగోవిందాష్టకమ్ పై ఆధ్యాత్మిక ప్రవచనం జరిగింది. తొలుత ఆలయకమిటి అధ్యక్షులు సీహెచ్. మస్తానయ్య, సహాయ కార్యదర్శి ఊటుకూరి నాగేశ్వరరావు, సుందర సత్సంగ్ సభ్యులు జ్యోతిప్రజ్వలన చేసి కార్యక్రమాన్ని ప్రారంభించారు. సుందర సత్సంగ్ సభ్యులు కె.వి. కోటేశ్వరరావు ప్రవచిస్తూ గోవిందాష్టకమ్ అనేది జగద్గురు ఆదిశంకరాచార్యుల వారు శ్రీకృష్ణుడిని స్తుతిస్తూ రచించిన ఒక అత్యంత మధురమైన , భక్తిరస పూరితమైన స్తోత్రమన్నారు. ఎనిమిది శ్లోకాలతో కూడిన ఈ అష్టకంలో శ్రీకృష్ణుని లీలలు , ఆయన దివ్య మంగళ స్వరూపం , పరమాత్మ తత్త్వం అద్భుతంగా వర్ణించబడ్డాయన్నారు. శంకరాచార్యుల వారు ఈ స్తోత్రంలో కృష్ణుడిని కేవలం ఒక గోపాలకుడిగా మాత్రమే కాకుండా , సృష్టి-స్థితి-లయ కారకుడైన పరబ్రహ్మ స్వరూపంగా కొనియాడారన్నారు.
ఆలయంలో ఆంగ్ల నూతన సంవత్సర వేడుకలు
స్థానిక బృందావన్ గార్డెన్స్ శ్రీ వేంకటేశ్వరస్వామి దేవాలయంలో బుధవారం ఆంగ్ల నూతన సంవత్సర సందర్భంగా భక్తులతో కిటకిటలాడింది. దేవాలయ పాలకవర్గం వారి ఆధ్వర్యంలో అర్చకస్వాములచే స్వామి మూలవిరాట్లకు విశేష పూజలు, ప్రత్యేక అలంకరణలు జరిగాయి. తెల్లవారు జామునుంచే భక్తులు స్వామి దర్శనానికి బారులు దీరారు. స్వామిని దర్శించుకొని ప్రత్యేక పూజలు చేశారు. ఈ సంవత్సరం తమ జీవితాలు సుఖసంతోషాలతో ఉండాలని, దేశం సుభిక్షంగా ఉండాలని స్వామిని కోరారు. సాయంత్రం ప్రముఖ ఆధ్యాత్మిక వేత్త డాక్టర్ కె.వి. శ్రీరంగనాయకిచే తిరుప్పావై పై ఆధ్యాత్మిక ప్రవచనం అనంతరం గాయనీమణులు జరీనా, పరమేశ్వరి బృందం తమ గాత్రధారణలో పలు భక్తిగీతాలను శ్రావ్యంగా ఆలపించి ప్రేక్షకులను ఆకట్టుకున్నారు. ధార్మిక ప్రాంగణంలో స్వాములకు సద్ధి కార్యక్రమం, చండీహోమం జరిగాయి.
కామెంట్లు
కామెంట్ను పోస్ట్ చేయండి